Mensagem Politika Partido Democratico Iha Loron Mundial Feto Nian

PARLAMENTO NACIONAL

Bancada Partido Democrático

Nai Presidente RDTL, mak ami hahi no hana’i,

Nai Presidente Parlamentu Nasional, Vice Premeiru Ministru, Ulun bot ONU nian iha Timor Leste, Nai Atul Khare,Nai, ex Presidente RDTL, Ex Presidente Parlamento Nasional, no ex Premeiro Minitro,reprezentante Igreza Katholika no reprezentante konfiksaun sira selu, Maluk deputadu sira, membru guvernu, embasador no reprezentante Agensia Internasional, nasional sira, no publiku tomak mak ami han’ai,

Loron ida ohin, loron nebe, lori ita nia konsiensia, atu hare hikas kriatura maromak nia, nebe hanaran feto, tuir ita ida-ida nia fiar no dalan fiar ba Maromak, nebe halo ita moris hamutuk, entre feto no mane, iha mundu rai klaran.

Loron ida ohin, loron nebe, lori ita nia konsensia, atu hare no hanoin hikas, dignidade natureza umanu nudar feto, no direitu absulutafeto nian, ba moris no hamoris nia an, iha ambiente domin no lia los, dame no justisa, tuir ukun no bandu, iha nasaun ida nia laran.

Fiar ba feto nudar kriatura maromak nian, nebe mos, iha dignidade natureza umanu no direitu absuluta, hanesan ho mane, mak ohin loron, lori ita halibur malu, iha uma fukun ida ne’e, hodi haklaken, ita nia refleksaun ba vida moris umanu, no komitmentu ba dignifikasaun feto nudar kriatura, nudar inan no nudar parseiru moris mane nian.

Nai Presidente RDTL, Presidente Parlamento Nasional, Premeiro Ministro no publiku tomak.

Partido Democrático, liu hosi nia bancada parlamentar, haklaken nia mensazen politika ba publiku tomak, katak:

1. Bancada Partido Democratico, sei fo nia esforsu no komitmentu tomak, atu fo dalan no fatin, ba protesaun valor no prinsipiu direitus umanus feto nian, tuir ukun no badun, iha nasaun ida ne’e. Ba nune, entre feto no mane Timor oan sira, la bele monu ba determinasaun, hodi hamrik no hasoru malu, hodi hasusar no hakanek malu, nu fin, bele satan no hatodan prosesu dezemvolvimentu,uma kain ka famila nian, no famila bot nasaun Timor Leste,

2. Bancada Partido Democratico, sei hahi no hana’i kultura dame no domin hanesan mata dalan, hodi hametin no haburas, direitu no dignidade, feto no mane nudar ema, no nudar Timor nia oan, iha Timor ida deit, mak Timor Leste ukun rasik an, iha mundu rai klaran.

3. Maske ema ida-ida, feto no mane, tenki hahi no hana’i,direitu absoluta ba moris no hamoris nia an, maibe, Bancada Partido Democrático, husu, atuita hot-hotu, feto no mane, tenki la’o tuir ukun o bandu, tuir natureza kultura no lisan Timor nian. Ita ida-ida, entre feto no mane, tenki respeita malu no ivita intervensaun ba malu, hodi hadau malu, ba fatin nebe, la tuir ita nia kbit no talentu, nebe maromak halot ona, hodi kahen no kesi, iha ita ida-idaniakabas.

4. Atu feto Timor Leste, bele iha konhesementu no kapasidade diak, maka Bancada Partido Democrático, propoin ba Estado Timor Leste ho agencia Internasional sira, atu bele hare dadauk ona, Centro Formasaun Politika ba Feto, hodi prepara líder no lideransa feto Timor Leste nian, iha setor politika no setor sira seluk.

Nai Presidente RDTL, Presidente Parlamento Nasional, Premeiro Ministro no publiku tomak.

Atu hakotu, Bancada Partido Democrático nia mesazen politika, hau hasaran, lia fuan mata dalan ida ba ita hotu, nebe tatoli ho lian Ingles, hanesan tuir mai: “Education makes people easy to lead but difficult to be driven, education makes people easy to govern but difficult to be slaved”. Karik ho lian Tetum hanesan ne’e “ Matenek halo ema fasil atu lori maluno hamaluk malu,maibe difisil atu utiliza malu, matenek halo ema fasil atu ukun malu, maibe difisil atu sai atan ba malu”.

Mak ne’e deit, parabeins ba feto Timor Leste, parabeins ba feto grupu parlamentar, no parabeins ba feto iha mundu rai klaran. Obrigadu wain.

Dili, 10 de Marco de 2009

Adriano do Nascimento

Chefe Bancada PD